ଜଗନ୍ନାଥ ଯା’ର ପରିଚୟ ପତ୍ର
ମଧୁର ଯାହାର ଭାଷା
ବୀର ପ୍ରସବୀନି ସେଇ ମୋ ଜନନୀ
ସୁନ୍ଦର ନାମ ଓଡିଶା ।।
ଗିରି ନଦୀ ବନ ନନ୍ଦନକାନନ
ଆମ୍ବ ପଣସର ବଣ
କିଆବୁଦା ପୁଣି ପୋଖରୀର ହୁଡା
ପଲ୍ଲୀରେ ରହେ ଯା’ ମନ ।।
ସୁନାର ଚଢେଇ ବାନ୍ଧି ହୋଇଥିଲା
ଦିନେ ବିଦେଶୀ କବଳେ
ବକ୍ସି ଜଗବନ୍ଧୁ ଚନ୍ଦନ ହଜୁରୀ
ଲଢିଥିଲେ ସେତେବେଳେ ।।
ଜୟୀ ରାଜଗୁରୁ ଅମର କାହାଣୀ
ଏବେବି ମାଟିରୁ ଫୁଟେ
ବାଜି ରାଉତର ବୀରତ୍ଵ ଗାଥାରେ
ଆଖିରୁ ପାଣି ଯେ ଛୁଟେ ।।
ପାଇକ ମହାନ ଜାତିର ସଇନ
କ୍ରାନ୍ତିର ପଥରେ ଚାଲି
ଫିରଙ୍ଗି ଶାସନ ଦୋହଲାଇ ଦେଇ
ରାଇଜୁ ଦେଲେ ସେ ଠେଲି ।।
ଶଙ୍ଖକ୍ଷେତ୍ର ଏଠି ଅର୍କକ୍ଷେତ୍ର ଏଠି
ତୁଳସୀ କ୍ଷେତ୍ର ବି ଅଛି
ଶାବର ଶ୍ରୀକ୍ଷେତ୍ର ଏକାମ୍ର କ୍ଷେତ୍ରକୁ
ବିଧାତା ରଖିଛି ବାଛି ।।
ହିଙ୍ଗୁଳା ମଙ୍ଗଳା ମାଆ ସମଲେଇ
ଘଣ୍ଟ ଘୋଡେଇ ରଖିଛି
ସାରଳା ଚର୍ଚ୍ଚିକା ମାଆ ବିରଜାଙ୍କ
ଆଶରା ପୁଣି ମିଳିଛି ।।
ଜଗତର ନାଥ ଉଡାଇଣ ନେତ
ରତ୍ନ ସିଂହାସନେ ବସି
ଗରଳ ପିଇଣ ବାବା ଲିଙ୍ଗରାଜ
ବାଣ୍ଟି ଦେଉଛନ୍ତି ଖୁସି ।।
କୋଣାର୍କ ବର୍ଣ୍ଣନା କରିବାକୁ ନାହିଁ
ମୋ ପାଖରେ କିଛି ଭାଷା
ପିପିଲି ଚାନ୍ଦୁଆ ପଟ୍ଟଚିତ୍ର ପାଇଁ
ପ୍ରସିଦ୍ଧ ଆମ ଓଡିଶା ।।
ଖଣ୍ଡୁଆ ପାଟକୁ ବରମ୍ପୁରୀ ପାଟ
ସମ୍ବଲପୁରୀ ତ ଶାଢୀ
ପ୍ରତି ପ୍ରାନ୍ତ କଥା ବିଭିନ୍ନ ମହତ୍ତ୍ଵ
ଓଡିଆତ୍ଵ ଦିଏ ବାଢି ।।
ନିମାପଡା ଝିଲ୍ଲୀ ପାହାଳର ମିଠା
ଥରେ ଖାଇଅଛି ଯିଏ
ନୟାଗଡ ପୋଡ଼ ସାଲେପୁର ଠାରୁ
ରସାବଳୀ ଥରେ ଖାଏ ।।
ବାରିପଦା ମୁଢି ଓଡିଆଣୀ ଶାଢ଼ୀ
ପୁରୁଷ ଧୋତି ଗାମୁଛା
କୋରାପୁଟ ନନି ଉଡାଇଲେ କାନି
ଓଡିଆତ୍ଵ ବହେ ତୁଛା ।।
ଓଡିଶୀ ମାହାରୀ ଚମ୍ପୁ ଆଉ ଛାନ୍ଦ
ଛଉନୃତ୍ୟ ପରମ୍ପରା
ଢେମସା ସାନ୍ତାଳୀ ସମ୍ବଲପୁରୀ ତ
ନାଚରେ ଜିଣିଛି ଧରା ।।
ପ୍ରକୃତି ହସୁଛି କୋଣେ ଅନୁକୋଣେ
ଚିଲିକା ଢେଉରେ ପୁଣି
ଚନ୍ଦ୍ରଭାଗା କୋଳେ ସୁନେଲି କିରଣ
ସୂରୁଯ ଦିଅନ୍ତି ବୁଣି ।।
ଦେଓମାଳି ଅଛି ଅଛି ପୁଣି ସିନ୍ଧୁ
ସିମିଳିପାଳ ବି ଅଛି
ଭିତରକନିକା ଗହୀରମଥାକୁ
କିଏ ଅବା ଭୁଲିଅଛି ।।
ଜଳ ସମ୍ପଦକୁ ଖଣିଜ ପଦାର୍ଥ
ଓଡିଶା ଗର୍ଭରେ ଧରି
ବର୍ଣ୍ଣିବାକୁ ଅଛି ଆହୁରି ଅନେକ
କଲମ ଯାଉଛି ସରି ।।
ପଲ୍ଲୀ ଠୁ ନଗର ମେଳଣ ଜାଗର
ଯାନିଯାତ୍ରା ପୁରିଅଛି
ରଥଯାତ୍ରା ଦେଶ ବିଦେଶେ ପ୍ରସିଦ୍ଧ
ବରଦାନ ମିଳିଅଛି ।।
ଯେତେ ବଖାଣିଲେ ଗଉରବ ଗାଥା
ନିଅଣ୍ଟ ରହିବ ଭାଷା
ସଂସ୍କୃତି ପରବ ଜାଣିବକୁ ହେଲେ
ବୁଲିବ ଆସ ଓଡିଶା ।।
ପଦ୍ମାଳୟା ମିଶ୍ର
ଚୂଡଙ୍ଗ ସାହି, ପୁରୀ, ଓଡିଶା